Генералниот секретар на СДСМ, Љупчо Николовски, како срамна ја оцени одлуката на Уставниот суд за задржување на висината на платите за време на криза и соопшти дека сите избрани и именувани функционери на СДСМ разликата во платата над 14.500 денари ќе ја донираат во државниот фонд за помагање на граѓаните и за борба против коронавирусот.
„Во духот на солидарноста, министри, пратеници, заменик-министри, државни секретари, директори на претпријатија и други функционери на СДСМ, ќе земаат минимална плата од 14.500 денари, без оглед на одлуката на Уставниот суд“, истакна партискиот генерален секретар, кој додаде дека СДСМ разбира низ што минуваат граѓаните и дека само со заедништво и солидарност ќе се надмине економската криза.
Досега градоначалниците на Крива Паланка, Штип, Охрид кажаа дека ќе се задржат на минималната плата и дека разликата ќе ја донираат во оваа кризна состојба во борбата против коронавирусот.