fbpx
21.8 C
Skopje

Груевски: СДСМ направи крупна изборна измама, решението е во предвремени парламентарни избори

АКТУЕЛНО

Лидерот на ВМРО-ДПМНЕ денеска во изјава за медиумите рече Македонија се соочува со период кој што е карактеристичен по тоа што се наоѓа после избори со една голема изборна измама. Тој додаде дека безмалку 60 дена граѓаните протестираат против „изборната измама“ која што им се случила.

„Како што видовме пред некој ден, граѓаните веќе ги преформулираа своите барања. Тие сфаќаат дека Заев не може да се откаже од Тиранската платформа, дека ја има превземено, дека има дадено цврсти ветувања, практично дека можеби е уценет или на некој начин нема излез. И затоа, претпоставувам се преформулира нивното барање во барање за предвремени избори“, рече Груевски.

Груевски нагласи дека тој и неговата партија тоа го побарале уште кон крајот на јануари.

„Ако тогаш СДСМ и нивните коалициони партнери го прифатеа тоа, сега веќе ќе имавме избори и ќе завршеше кризата. Сакам да потенцирам дека кога една партија ќе излезе на избори и ќе каже едно, а после ќе направи друго и со тоа ќе направи крупна изборна измама, таа партија треба да очекува дека ќе се соочи со револтот на граѓаните и тоа и се случува на Македонија, тоа и се случува на СДСМ и затоа кризата е пролонгирана. 

И потоа нека излезат тие со она што го нудат, со она што го прифатиле, со Тиранската палтформа, со се’ што сакаат. Ако граѓаните тоа им го одобрат, ако добијат мнозинство гласови, нека направат влада и нека го исполнат тоа што го наумиле и тоа што некаде го ветиле. Тоа е барањето на граѓаните во овие нивни револти и навистина никогаш досега не се случило толку многу долги и толку многу големи протести на граѓани низ цела Македонија, речиси 60 дена. Меѓу 100 и 200 илјади граѓани секој ден маршираат низ улиците во 30-тина градови во Македонија. Тоа е нешто за што опозицијата, односно СДСМ и партиите со неа треба да се замислат и треба да излезат во пресрет на народот, во пресрет на граѓаните, бидејќи на крајот на краиштата тие се тие кои што не само во декември, туку и во иднина треба да гласаат во Македонија и да даваат поддршка на една или на друга партија“, рече Груевски.

ПОСЛЕДНИ ОБЈАВИ

- Advertisement -