Пред пекарницата „Силбо“, на булеварот Партизанска во Скопје, денеска се собраа граѓани во знак на почит кон прерано згаснатиот живот на 22-годишната Фросина Ќулакова од Неготино.
Токму на ова место, во средата, таа беше прегазена од автомобил додека ја преминуваше улицата, на пешачки премин и на вклучено зелено светло за пешаци.
На металната ограда покрај пешачкиот премин, граѓаните оставаа цвеќиња и палеа свеќи крај фотографијата на Фросина.
Болката и тишината доминираа, а очите на присутните беа полни со солзи и само со едно прашање: „До кога?“
Транспарентите во рацете на граѓаните носеа пораки што го одразуваат револтот: „Врските не враќаат човечки живот“, „Уште колку?“…
Некои ја споредија трагедијата со несреќите на Викторија Николова и Фросина Цековска, кои исто така ги загубија животите на булеварот Партизанска во Скопје.
Протестот е мирен, без гласни довикувања, но тишината зборува сама за себе. Тоа што се случува во моментов пред „Силбо“ е молчалив крик против системот кој дозволува улиците да бидат смртоносни за пешаците.
Граѓаните бараат одговорност и промени – побезбедни пешачки премини, ригорозна контрола на сообраќајот и поостри казни за оние што ја игнорираат безбедноста.
Вечерта на 29 јануари, петнаесетина минути пред полноќ, 20-годишник со автомобил удри во 22-годишната Фросина која им подлегна на повредите на самото место.
Според наводите на Обвинителството, тој возел под дејство на алкохол, немал возачка дозвола и поминал на црвено.
