21.8 C
Skopje
Friday, March 29, 2024

Скандалот со Кембриџ Аналитика го чини Фејсбук 40 милијарди долари!

Акциите на гигантот Фејсбук доживеаја голем пад откако социјалната мрежа се соочи со жестоки критики по откритието дека фирма која работела на кампањата на Доналд Трамп илегално собрала податоци на 50 милиони корисници, пишува Дојче веле.

Се множат повиците за истрага на работењето на Фејсбук, откако беше откриена големата измама зад која стои британската фирма Кембриџ Аналитика. Во Британија е отворена истрага која треба да утврди дали Фејсбук сторил доволно за да ги заштити податоците на корисниците, откако беше откриено дека консултантска фирма ангажирана во претседателската кампања на Доналд Трамп илегално добила пристап до 50 милиони кориснички профили.

Британската комесарка за информации Елизабет Денхам соопшти дека побарала налог за претрес во канцелариите на Кембриџ Аналитика во Лондон.

Акциите на Фејсбук на берзите паднаа за речиси 7 проценти во понеделникот, што претставува загуба од околу 40 милијарди долари од неговата пазарна вредност. Инвеститорите се загрижени дека новото законодавство би можело да му наштети на рекламниот бизнис на компанијата и да ја намали нејзината привлечност за корисниците.

Истрагата за работењето на Кембриџ Аналитика и Фејсбук е дел од поширока истрага во користењето на личните податоци, вели Денхам, чија служба е задолжена за спроведување на британскиот закон за заштита на лични податоци.

„Разгледуваме дали Фејсбук ги обезбедил и заштитил личните информации на платформата и дали, откако откриле за проблемот, реагирале робустно и дали корисниците биле информирани“, изјави Денхам за БиБиСи.

Кембриџ Аналитика ги демантира медиумските извештаи дека ги злоупотребила корисничките податоци, и тврди оти ги избришала сите Фејсбук податоци кои ги добивала од трети страни.

Дополнително, од фирмата тврдат дека податоците на корисниците на Фејсбук не биле користени во претседателската кампања на Доналд Трамп.

поврзани објави

- Advertisement -
- Advertisement -

Последни објави

- Advertisement -