Почина актерот на Албанскиот театар Сефедин Нуредини.
Замина големиот актер и човек Сефедин Нуредини. Роден на 24 јануари 1953 година во Куманово, тој почина на 14 јануари 2017. Актерска игра дипломира 1978 година на Факултетот за драмски уметности во Скопје, и како додека студираше, продолжи да игра во тогашната Албанска драма при Театарот на народностите – Скопје, во чиј репертоар целосно се изгради како актер ѕвезда. Зад него се стотина ликови од кои најголем дел носечки. Нив Сефо неуморно ги создаваше во театарските претстави, а оствари и голем број на ликови во тв серии и филмови од домашна и странска продукција. Своето богато актерско искуство им го пренесуваше и на младите актери – студенти по глума, со свои класи на албански јазик при театарските академии/факултети.
Во периодот од 1991 до 1995 година беше директор на Албанската драма, а потоа, еден период од 2000 година беше и генерален директор на Театарот на народностите – Скопје.
Сефо беше ценет и почитуван актер, човек и другар кој несебично се даваше на неговата љубов – театарот. За одиграните ликови доби повеќе награди, меѓу кои се „Трајко Чоревски“ за најдобар млад актер на МТФ „Војдан Чернодрински“ за ликот на Поручникот во „Да се спаси надежта“, наградата за најдобро актерско остварување на МТФ „Војдан Чернодрински“ за Прометеј во „Прометеј“, наградата „Александар Мојсиу“ на Националниот фестивал на професионалниот албански театар (Албанија) – напиша Лилјана Мазова.
„Со длабока тага ја примивме веста за смртта на нашиот драг пријател и колега, актерот на Албанскиот театар од Скопје, неповторливиот Сефедин Нуредини.
Неговата прерана смрт остава ненадоместлива празнина, не само во ансамблот на Албанскиот театар, туку и во македонскиот театар воопшто. Ќе го паметиме по извонрендите крации и бескрајната љубов и посветеност кон магијата наречена театар“, стои во реакцијата од колективот на Драмскиот театар во Скопје.