Министерката за образование Весна Јаневска вели дека повисоки плати за наставниците ќе има кога ќе се создадат буџетски услови за тоа и дека како наставник точно ги знае проблемите и предизвиците со кои се соочуваат наставниците.
„Верувам дека наставниците знаат и се длабоко убедени дека ако некој сака тие да имаат подобар стандард, тоа сме јас како министер и нашата Влада. Јас не сакам да им се покачи платата 3%, сакам да им се покачи платата 30% уште утре, кога тоа би било можно. Она што го наследивме во Буџетот на МОН е цел едногодишен буџет истрошен за половина година. Необезбедени плати за наставници, за професори, неисплатена помош на ученици, неисплатени стипендии на студенти, неисплатени превози за училиштата, кон општините, необезбедени учебници за повеќе години и за повеќе предмети, неисплатени обврски за лиценци Фулбрајт, ПИСА и кон други странски партнери, студентски домови во распад, ученички домови во распад“, посочи Јаневска.
Таа ги замоли наставниците да постапуваат со онаа пасија како кога се запишале на факултетот, како кога ја посакале таа професија, и да ја реализираат оваа учебна година со нивната волја и желба, за да придонесат за знаењето на учениците и за напредокот на државата.
„Она што им следува на наставниците, тие ќе го добијат во оној момент кога државата ќе може тоа да го направи. Јас како министер грчевито ќе се борам на Влада, тоа да биде што е можно повеќе“, рече Јаневска.
Рече дека МОН е секогаш отворено за разговори со синдикатите, но во момент кога државата била во слободен пад што новата Влада се обидува да го запре, наставниците треба да имаат верба во Владата и во министерката за образование и да бидат сигурни дека нема да бидат заборавени.