Претседателот на Владата, Христијан Мицкоски, во вечерашното гостување во централниот дневник на „Тема на денот“, најави дека ќе се отворат сите претходни случаи, вклучувајќи ги оние за модуларната болница, дискотеката и Ласкарци, нагласувајќи дека нема да се запира додека не се добие одговор на тоа што точно се случило. Според него, ќе се оди до крај и ќе има разјаснување на сите неправилности, уверувајќи дека нема да остават ништо нерасчистено.
„Ќе ги следам сите овие случаи одблиску. Знам во која фаза се и очекувам обвинителството да ја прошири истрагата. Не само возачот на автобусот или управителот на правното лице да бидат идентификувани, туку и да се открие кој ја потврдил исправноста на автобусот, кој испитен центар го потврдил и како тој функционирал“, рече Мицкоски.
Тој исто така постави прашања за модуларната болница, прашувајќи зошто било сменето министерството кое го спроведувало проектот, што е причината за проблемите со кабелот, и кој ги направил проектите.
„Ќе има одговори за сето ова, нема да оставиме ништо. Ние тргнавме и нема да запре. Или тие или ние. Во животот постојат две опции: или тој или ти. Не може двата да опстанат, или Македонија и нејзините граѓани, или мафијашите“, изјави Мицкоски.
Тој додаде дека кога ќе се одлучи да влезе во битка, нема да има компромис, и дека тоа ќе биде „или јас или противникот“. На прашањето на новинарот дали го држи за збор, Мицкоски потврди: „Да ме држите за збор.“
