Кон, банкар од Вол стрит, беше клучниот архитект на минатогодишната даночна реформа и главен столб на антирепресивните сили во администрацијата на Трамп, објави Ројтерс.
„Ми беше чест да ѝ служам на мојата земја и да ги спроведувам економските политики насочени кон раст во корист на американскиот народ, особено историската даночна реформа. Благодарен сум му на претседателот што ми ја даде оваа шанса и нему и на администрацијата им посакувам многу успех во иднина“, рече Кон вчера во изјава што ја пренесе Белата куќа.
Од друга страна, Трамп вели дека наскоро ќе одлучи кој ќе биде новиот економски советник. „Наскоро ќе одлучиме кого да назначиме за нов економски советник, многумина ја сакаат оваа работа – ќе одлучиме мудро“, напиша Трамп на Твитер.
Will be making a decision soon on the appointment of new Chief Economic Advisor. Many people wanting the job – will choose wisely!
— Donald J. Trump (@realDonaldTrump) March 7, 2018
Како што изјави еден официјален претставник од Белата куќа, главни кандидати за нов советник се советникот во Белата куќа и директор на Националниот трговски совет на Белата куќа Питер Наваро и конзервативниот коментатор Лари Кадлоу.
Како што објави АП, Кон се противел на одлуката на Трамп да наметне царински давачки за челик и алуминиум и се обидел да го премисли. Трамп, сепак, остана цврсто на одлуката и повтори дека ќе ги воведе овие царини во наредните денови.
Заминувањето на Кон претставува уште еден удар за администрацијата, која по изборите претрпе неколку значајни оставки. Хоуп Хикс, блиска соработничка на Трамп и директорка за комуникации, се повлече минатата недела, а меѓу другите високи личности што заминаа се и поранешниот шеф на персоналот на Трамп, Реинс Прибус, и поранешниот главен стратег Стив Банон.
Но оставката на Кон, поранешен главен оперативен раководител во „Голдман Сакс“, може да има најголеми последици, вели Гардијан. Таа доаѓа откако глобалните пазари беа потресени од одлуката на Трамп да продолжи со плановите за воведување царини за трговските сојузници, за што инвеститорите стравуваат дека би можеле да предизвикаат меѓународна трговска војна.
