Разговараме со 20. годишниот фудбалер на Академија Пандев Кристијан Велиновски, кој во изминатата сезона беше позајмен фудбалер на ФК Брегалница Штип каде постигна 10 голови и беше еден од клучните фудбалери за позитивните резултати на тимот.
ПОГЛЕД: Од каде желбата за играње фудбал, кога Кристијан Велиновски одлучи дека сака да биде фудбалер?
Уште од мал го сакав фудбалот. Многу често со децата со кои се дружев како мал знаевме да го поминуваме поголемиот дел од денот играјќи фудбал. На 11 годишна возраст почнав активно да тренирам во локалниот фудбалски клуб од родниот град Делчево односно во ФK Брегалница Делчево. Пред пет години играв за младинската категорија на ФК Брегалница Штип од каде што заминав во Академија Пандев од Струмица.
ПОГЛЕД: Како си задоволен од програмата на академијата за развој на млади фудбалери?
Самото име „ФК Академија Пандев“ зборува за тоа за каков клуб станува збор. Академијата е основана од страна на македонската фудбалска легенда Горан Пандев, по кого е и наречена Академијата. Кога ќе се спомне неговото име и презиме, се знае дека не треба некое посебно објаснување. Едноставно, клубот има извонредна програма за развој на млади играчи, а за сето тоа нормално придонесува целиот стручен штаб на тимот.
ПОГЛЕД: По една сезона како позајмен фудбалер на ФК Брегалница од Штип, се враќаш во академијата. Кои ќе бидат твоите цели сезонава и што можеме да очекуваме од младиот и талентиран фудбалер кој ја воодушеви штипската публика?
Од Штип имам само добри спомени. Ја користам оваа прилика да им се заблагодарам на соработката. Нормално, јас не застанувам овде и како млад фудбалер враќањето во „ФК Академија Пандев“ ми дава поголем мотив за уште поголеми успеси не само на мене како фудбалер, туку и на самиот фудбалски клуб.