Летово одморот во соседна Грција ќе не чини поскапо отколку минатата година. Грците драстично качија некои од цените, па така, кафето и пијалаците во просек чинат 1 евро повеќе отколку во 2017 година. Како што објави српски „Телеграф“, во Олимпискиот регион половина литар домашно грчко пиво чини во просек околу 3,5 евра, а увозните до 4,75 евра.
Слични се цените и на Халкидики. Во Сарти можете да уживате на лежалките на плажа бесплатно, но само доколку платите најмалку еден пијалак, главно кафе кое чини 4 евра или пак пиво чија цена се движи од 3 до 5 евра.
Во Неа Мармарас цените се малку повисоки. Таму за грчко фрапе треба да одвоите 3 евра, а за мало пиво дури 5 евра.
Никити е можеби и најевтино место на краците. Таму кафето не надминува 2,5 евра а со тоа добивате и бесплатно лежалка. Пивото пак достигнува максимална цена од 4 евра. Сендвичите и суфлакито чинат од 2,5 до 4 евра.
Шишенце вода од половина литар чини 50 центи, а она од еден литар од 1,5 до 1,7 евра.
Цените во рестораните, исто така, се поскапи за 1,5 евро и споредба со податоците од 2017 година, па така за оброк во просечен ресторан ќе платите најмалку 8 евра. Што се однесува до цените на уличната храна, тие не се разликуваат многу во цела Грција – 2,5 евра гиро, сувлаки 2,90 евра, тиропита 2,5 евра итн.
Во места каде што се плаќаат лежалки цената е обично 5 евра за лежалка (северна Грција и островите Додеканези), додека на Кикладите изнајмувањето лежалки за плажа е многу скапо, и се движи до 120 евра во Миконос.