Тренерот на најтрофејниот фудбалски клуб во Македонија Чеде Јаневски, истакна дека е задоволен од играта, посебно во вториот дел против Шкендија, каде препознал агилност на своите играчи и желба за победа.
Јаневски истакна дека играчите се заслужни за триумфот над лидерот во првенството Шкендија, и дека со ова покажале карактер.
„На овој натпревар играа двете најдобри екипи во првенството. Првото полувреме го почнавме срамежливо. Се чекаше на грешка, а како одминуваше времето во финишот Шкендија одигра малку подобро од нас. Ние немавме решение во организација на нападот. Тоа Шкендија добро го искористи и во една добра организација, знаевме дека нивниот напад е посилниот дел од тимот, и беа поопасни, и тоа резултираше со гол“.
„Првото полувреме го одигравме под нашите можности. Во вториот дел направивме две измени, го сменивме начинот на играта и со висок притисок им направивме доста проблеми на Шкендија. Почнавме добро и тоа веднаш резултираше со израмнување. За жал не траеше долго бидејќи противникот стигна до ново водство. Потоа за мене се случи еден многу важен момент. Веднаш дојдовме до гол и до 2:2 и тука можам да искажам честитки за играчите кои не се обесхрабрија. После тој израмнувачки гол бевме подобар тим“.
„Можевме порано да го решиме победникот во завршницата каде што требаше само порано да го „погодиме“ играчот за тој да реализира. Сите честитки одат на играчите, затоа што против ваков противник кој што немаше пораз да го завртиш резултатот и да му дадеш четири гола, тоа е за почит“, истакна Јаневски.
Извор: Спорт клуб