Во неделата несовесни граѓани го злоупотребиле отсуството на полицијата и ја прекршиле забраната за возила на Водно.
Градоначалникот на Град Скопје Петре Шилегов денеска изјави дека забраната за движење на моторни возила до Средно Водно важи и натаму, дека таа се почитува, освен во неделата кога, како што рече, несовесни граѓани го злоупотребиле отсуството на полицијата и ја прекршиле.
– В петок кога е државен празник и кога важи забраната ќе бидете сведоци дека во целост ќе го забраниме сообраќајот на возилата од 9 часот наутро до 16 часот попладне – рече Шилегов одговарајќи на новинарско прашање при посетата на пунктот за бездомници во Момин Поток.
Тој додаде дека е прилагоден и возниот ред на јавниот градски сообраќај, оти автобусите се почести со цел да не се создаваат гужви и граѓаните да можат да го користат.
