Меѓународна потерница за Артан Груби
Поранешниот вицепремиер Артан Груби е во бегство, а премиерот Христијан Мицкоски не ја потврди изјавата на вицепремиерот Изет Меџити дека Груби се наоѓа во Албанија.
„Не би сакал да шпекулирам за тоа дали Артан Груби е во Албанија или Косово, но вистината е дека не може да се каже дека е сосема невин. Ако беше толку чист како солза, немаше да побегне од правдата. Наместо да се крие, ќе беше овде за да ја докаже својата невиност,“ изјави премиерот Христијан Мицкоски.
Интерпол во координација со МВР
Од Министерството за внатрешни работи (МВР) соопштија дека е распишана меѓународна потерница за Груби и дека се преземаат мерки за негово пронаоѓање во координација со Интерпол и соседните земји.
„Во координација со Интерпол и полициите од соседните држави, преземаме активности за лоцирање на лицето,“ информираа од МВР.
Неофицијално, досега не се добиени одговори од соседните земји.
ДУИ се оградува, опозицијата бара одговорност
ДУИ се дистанцира од својот поранешен висок функционер, додека опозицијата бара политичка одговорност и критички се осврнува на институционалните пропусти. Јавноста, исто така, бара одговори за тоа како Груби успеал да ја напушти земјата.
Дисциплински постапки за полицајците на „Блаце“
Во врска со бегството на Артан Груби, двајца полицајци на граничниот премин „Блаце“ се предмет на дисциплински постапки. Едниот е суспендиран, а против него е поднесена кривична пријава. Се анализираат снимките од камерите, а телефонот на еден од полицајците ќе биде вештачен.
Одлука за жалбата за притвор
Кривичниот суд треба да донесе одлука за жалбата на Груби против определениот 30-дневен притвор, кој е изречен и за директорот на Државна лотарија, Бајрами.