Мицкоски: Зголемениот извоз е показател за довербата во Владата
Премиерот Христијан Мицкоски во вечерашното интервју говореше за економските показатели, минималната плата и синдикалните барања, нагласувајќи дека Владата на ВМРО-ДПМНЕ работи во насока на економска стабилност и заштита на интересите на работниците.
Зголемен извоз во услови на криза
Мицкоски изрази задоволство од зголемувањето на извозот за 5% во јануари, посочувајќи дека тоа е позитивен сигнал за економијата, особено во време на глобална економска нестабилност.
— Среќен сум што во јануари имаме 5% зголемен извоз. Ќе видиме како ќе продолжи годината, но во услови на криза, особено во автомобилската индустрија, ова е здрав економски показател. Ова значи дека фирмите и граѓаните имаат доверба во Владата. — изјави тој.
Тој додаде дека овој позитивен тренд е остварен и без активирање на унгарскиот кредит, што дополнително покажува дека економските политики се поставени во вистинска насока.
Осврнувајќи се на предлогот на Сојузот на синдикати на Македонија (ССМ) за зголемување на минималната плата, премиерот истакна дека секое покачување мора да биде внимателно испланирано, бидејќи тоа директно влијае на колективните договори и останатите плати во економијата.
— Ова не е прашање само дали Владата треба да го направи тоа или не. Средствата не се предвидени во буџетот. Многу колективни договори во државата зависат од минималната плата. Ако мислат дека ќе донесеме одлука за минимална плата од 30.000 денари, а потоа Владата нема да ја почитува, тие не ја разбираат нашата одговорност. — порача Мицкоски.
Тој потсети на неодговорното управување на претходната власт и негативните последици од таквото однесување, споменувајќи дека Министерството за одбрана исплатило 30 милиони денари за тужби како резултат на правни пропусти од минатото.
Мицкоски потсети дека ВМРО-ДПМНЕ, додека беше во опозиција, активно комуницираше со синдикатите и се залагаше за правата на работниците. Тој ги критикуваше дел од синдикалните лидери, велејќи дека нивните вистински интереси наскоро ќе бидат јасни за јавноста.
— Кога бевме во опозиција, нашите пратеници комуницираа со сите синдикати и застанавме зад работниците, бидејќи гледавме како се крадат нивните пари. Додека исчезнуваа средства, се градеа фабрики за марихуана, гореа модуларни болници, а огромни скандали остануваа без одговорност. — изјави премиерот.
Со ова, тој упати порака дека Владата ќе продолжи со одговорни економски политики и ќе работи во интерес на граѓаните, без да подлегнува на притисоци што би можеле да ја загрозат економската стабилност на државата.
Мицкоски потсети дека се бори за 5.000 работни места со новиот кредит. Тој исто така истакна дека со осмомартовската пензија, пензионерите ќе добијат 2.500 денари линеарно зголемување.
Тој додаде дека е намален јавниот долг и дека е вратен 500 милиони евра долг, земен во 2018 година од претходната Влада.
– Тогаш не обвинуваа, правеа пресметки, но не знаат да се извинат.