По трагичниот пожар во Кочани, во кој животот го загубија 59 млади луѓе, иницијативата за изградба на меморијален парк го привлече вниманието на јавноста.
Кочанчанецот Дарко Арсов, кој стои зад оваа идеја, ексклузивно за ПОГЛЕД открива детали за проектот, инспирацијата и неговите очекувања.
Според неговата замисла, паркот ќе зафаќа 1.600 квадратни метри и ќе биде простор на тишина, сеќавање и духовен мир.
Во разговор со нашиот портал, Арсов зборува за мотивите што го поттикнале, како и за реакциите што ги добил откако ја сподели својата визија на „Фејсбук“.
ПОГЛДЕД: Кои се вашите мотиви за изградба на овој парк, а во кој е предвидена изградба и на црковен храм?
Сакајќи да го најдам својот мир и утеха, дојдов до оваа идеја. Замислата е да се најде место каде што нашите сограѓани би можеле да најдат барем малку утеха – иако вистинска утеха во овој момент не постои.
Од коментарите што ги читам, станува јасно дека оваа локација можеби не е најсоодветна за меморијален парк. Можно е само да се сруши локалот и да се подигне споменик – а можеби и тоа нема да се случи, со оглед на тоа колку брзо се сака да се заборави.
ПОГЛЕД: Како би сакале овој меморијален парк да влијае врз граѓаните и идните генерации?
Сметам дека споменикот треба да биде токму на трагичното место, како што е направено во Моклиште, Крушево, Велес и на многу други места што сведочат за загубите од минатото. Но, во овој момент многу луѓе не сакаат веќе ни да слушнат за тоа место и сакаат да заборават. И тие, на некој начин, се во право. Сепак, заборавот не е решение. Ова не е само лична загуба – ова е колективна рана која бара почит.
ПОГЛЕД: Дали вашата идеја има поддршка од локалните власти и заедницата за реализација на овој проект?
Идејата останува – да се изгради нешто во чест на загинатите, за тие никогаш да не бидат избришани од сеќавањето. Локацијата може да ја одредат локалните власти, бидејќи ова е приватно земјиште.
Во центарот на градот постојат и подобри локации каде што може да се изгради меморијален парк, но тоа е одлука која треба да ја донесат општинските служби и локалните власти. Прашањето е – дали ќе покажат волја и одговорност да сторат нешто што ќе остане за идните генерации? – изјави Арсов.
Како што објасни тој, проектот предвидува високи тополи што ќе создаваат чувство на заштита и интимност, како и меморијален ѕид со имињата на загинатите – траен потсетник на нивната жртва.
Во паркот ќе има и фонтана, симбол на животот и обновата, како и мала црква која ќе внесе духовна димензија и ќе претставува место за молитва и смиреност. Просторот ќе биде облагороден со зеленило, лаванда и други природни елементи, кои ќе придонесат за мирна и медитативна атмосфера. Високите тополи ќе создадат чувство на заштитеност и интимност, додека меморијалниот ѕид со имињата на загинатите ќе носи емоционална тежина и ќе биде сведоштво за нивната жртва. Фонтаната, која симболизира животот и обновувањето, и малата црква ќе внесат духовен аспект, создавајќи мирна и медитативна атмосфера. Паркот ќе биде место каде што сеќавањето и тагата ќе се претвораат во надеж и сила, вели Арсов.