Рочиште за екстрадицијата на Грујевски и Бошковски

Во Солун денеска треба да се одржи рочиште за барањето од македонските власти за екстрадиција на поранешните началници во Управата за безбедност и контраразузнавање (УБК) Горан Грујевски и Никола Бошковски, обвинети од СЈО за предметот „Тврдина и Таргет“.  Двајцата се во притвор во затвор во близина на Солун. Ним им се суди во солунскиот суд и за фалсификуваните пасоши со кои беа фатени на 18 октомври годинава на аеродромот во Солун, кога се обидоа да заминат за Будимпешта. Ова судење е одвоено од постапката за екстрадиција. Тоа досега беше двапати одложувано бидејќи Судот во Солун не можеше да обезбеди преведувач од македонски на грчки јазик и обратно.