Полициски службеници на СВР Тетово-Полициска станица Гостивар, пред учениците од прва година од гостиварското Средно медицинско училиште, денеска ги презентираа планираните превентивно-едукативни активности од двата нови проекти „Безбедно управување со мопед“ и „Не седнувај зад волан без положен возачки испит“, пренесува МИА.
– Стручно обучените полициски службеници ги запознаа најмладите средношколци што се треба да поседуваат кога управуваат мопед и какви се законските санкции доколку не ги почитуваат правилата и прописите кои се однесуваат на оваа категорија учесници во сообраќајот. Тоа е пред се за нивна лична и безбедност на другите учесници во сообраќајот, рече Марјан Јосифоски портпарол на СВР Тетово.
Јосифоски дополни дека покрај оваа тема, учениците, беа информирани и за управувањето возило без положен возачки испит, каков и колкав е ризикот и законските импликации, доколку возат на „диво“, односно без да поседуваат валидна дозвола и како треба да постапуваат возачите-почетници
Целта на предавањата и проектите во кои се вклучени и другите средни училишта е подигнување на сообраќајната свест и култура и подобрување на вкупната безбедност на патиштата и улиците во Полог.
Иницијатор и носител на овие проекти е Отсекот за превенција, во соработка со гостиварската и тетовската локална самоуправа и со нив вкупно ќе бидат опфатени над 3.400 првокласници од Полошкиот регион.
(Миа)