Еден од последните шефови на мафијата во Сицилија – Салваторе (Тото) Рина, со прекар “Ѕверот”, отиде да даде сметка за својата богата биографија на друго место. Рина почина во 4 часот наутро на 17 ноември 2017 година. Рина бил во кома во последните денови после неколкуте операции, што ги претрпел. Обвинителството на Палермо нареди обдукција на телото на Рина, бидејќи смртта се случила во затворската болница во градот.
Ѕверот се смета за еден од највлијателните шефови на Коза ностра, тој е одговорен за убиството на судиите Фалконе и Борселино, едни од најпознатите личности учесници во борбата против мафијата во Италија. Тој беше уапсен на 15 јануари 1993 година, откако успеа 24 години да се крие од правдата. Рина е познат по своите сурови методи на дејствување. Ова е карактеристично за сицилијанската мафија во раните 1990-ти.
Католичката црква веќе објави дека нема да има јавен погреб за Рина. “Црквата категорично ја осудува мафијата и ги поддржува луѓето кои се борат против неа. Се разбира, ако семејството сака, свештеникот ќе ги придружува тленните останки на Рина до гробот со молитва, тоа не може да се откаже на никого“, прецизира портпаролот на италијанските бискупи Иван Мафеис.
Неколку месеци, неговите роднини, имајќи ја предвид неговата возраст и болест, побарале Рина да биде ставени во домашен притвор. Потоа имаше вистинска дебата во Италија за случајот, но не беше дадена дозвола.
Загриженоста на судиите беше дека Рина, и покрај своето здравје, веднаш ќе се врати во Корлеоне и повторно ќе може да ја искористи својата криминална моќ.
Ѕверот навистина има рекордна биографија, тој е осуден 26 пати на доживотен затвор, како првото негово кривично дело е од 1950 година во Корлеоне. Најсериозни дела секако се убиствата на судиите Фалконе и Борселино и нивните чувари во 1992 година. Тој, исто така, беше обвинет во големиот судски процес за врските меѓу државата и мафијата, случај што сé уште не е затворен.
Негов кум во подземјето е познатиот мафијаш Лучијано Лиџо, а самото влегување во криминалниот свет за Рина се случува на негови 18 години, кога тој е обвинет за убиство на свој врсник за време на тепачка.
Од овој момент започнува големата игра на мачка и глушец со полицијата, од која тој успева да се извлече повеќе од 20 години, па дури и се тврди дека живеел мирно во вила крај Палермо. Иако се наоѓа далеку од очите на јавноста, Рина успешно ги влече конците на мафијата и врши “големи” дела за организацијата.
Босот на сицилијанската мафија беше фатен на 15 јануари 1993 година во Палермо. Тото Рина всушност никогаш не ја напуштил Сицилија, според некои токму Бернардо Провенцано го предал на властите. До крајот на својот живот тој не се почувствувал виновен за ниту едно од своите дела.