Координаторот на пратеничката група на ВМРО-ДПМНЕ, Драган Данев, кој беше еден до ретките опозициски функционери кои активно учествуваа на референдумот за Договорот од Преспа, на денешната парламентарна седница повтори дека нема да гласа за промена на Уставот.
-Јас не сум експерт по меѓународно и уставно право, но од разговори со нив јасно е дека овој договор е штетен по македонските национални интереси. Точно е дека договорот ги отвора вратите кон НАТО и обезбедува извесна иднина за влез во ЕУ. И на ниеден начин не сакав да влијаам врз одлуката на граѓаните на референдумот, бидејќи тоа беше прашање за граѓаните и нивните семејства и идните генерации. Но, овој референдум и ДИК го прогласи за неуспешен и како пратеник кој дал заклетва дека ќе го штити Уставот немам ни можност ни волја да гласам против граѓаните – рече Данев.
Тој го праша премиерот Зоран Заев зошто не се обидел да постигне партиски, парламентарен или национален консензус за ова прашање, зошто не вклучил експерти од редовите на опозицијата или од кабинетот на претседателот Ѓорге Иванов, како и зошто пропадна предлогот Република Илинденска Македонија?