Мохамед Салах игра во страшна форма оваа сезона и без никаков сомнеж е најдоброто засилување во Премиер лигата, а неговите сензационални партии во дресот на Ливерпул се почесто му носат и споредби со играчот на кој многу наликува според стилот на игра, Лионел Меси.
Салах во своите почетоци го имаше епитетот „египетскиот Меси“ и на тој начин брзо и стана симпатичен на светската спортска јавност, а со последните изданија и неверојатниот „покер“ кој го изрежира на мечот со Ватфорд, повторно на сила добија споредбите со славниот Аргентинец кој десетина години наназад игра во врвна форма.
При една промоција на „Водафон“, Салах доби прашање на оваа тема, односно за тоа како влијаат врз него споредбите кои се прават меѓу него и Лионел Меси, а срдечниот Египќанец и во оваа ситуација беше многу приземјен и вели дека во овој момент може да се споредува со него само поради тоа што дава многу голови.
– Секако дека е нешто многу добро да добивате споредби со така голем играч кој е на врвот толку многу години. Но, јас ги прифаќам споредбите со Меси само што се поврзани за бројот на голови, во тоа сме единствено блиску, – вели скромниот Салах.